Home

Latest Post

Pekeng account, nabisto; mga estudyante, muling pinag-iingat

Pekeng account, nabisto; mga estudyante, muling pinag-iingat

Erika Lei H. Dacurawat

Naglabas ng alerto sa mga mag-aaral ang UPD College of Science Freshies, Shiftees, and Transferees Council (CSFSTC) noong ika-24 ng Hunyo tungkol sa insidente ng pagkalat ng isang pekeng Facebook account. Ito ay matapos ang sunod-sunod na insidente ng panghihimasok ng mga pekeng accounts sa mga opisyal na linyang pangkomunikasyon ng mga mag-aaral ng UP.  

Ayon sa pabatid na nilabas ng CSFSTC, isang personaheng nagngangalang “Juan Pablo B. Garcia” ang nagpanggap bilang mag-aaral ng programang BS Molecular and Biotechnology at University of the Philippines College Admission (UPCA) passer ng taong 2022 at nanghimasok sa social media channels ng mga estudyante.  Napag-alaman na nagpakilala rin siya bilang mag-aaral ng BS Mathematics at nakipag-usap sa iba pang mag-aaral gamit ang communication app na Discord.  Ipinagpapalagay na ang pagpasok ni Garcia sa mga social media channels ay upang maniktik sa mga estudyante.

Ipinabatid naman ng UPD University Student Council (USC) na ang katauhang ito ay humiling mula sa mga miyembro ng konseho ng “shoutout” mula kay USC Councilor Lance Daniel at na maisama sa mga group chat ng College of Science.

Samantala, ayon sa ulat ng mga nakasalamuha ni Garcia ay kabilang sa mga naging paksa ng usapan nila ang UP at pagiging target nito ng Marcos-Duterte Administration at ang cancel culture sa aktres at mang-aawit na si Toni Gonzaga.

Bagaman ang mga account ng nabanggit na katauhan ay na-deactivate na, kapansin-pansin ang tila sunod-sunod na insidente ng ganitong panghihimasok sa linya pangkomunikasyon kung saan ang mga personal na detalye ng mga lehitimong kasapi ng UP Diliman ang nailalagay sa panganib.  

Noong buwan ng Marso, isang kahina-hinalang Facebook group naman na nagngangalang “UPD – Profs to Pick” ang kumalat at nangalap ng personal na impormasyon ng mga mag-aaral ng UPD, kabilang ang Student Number at UP Mail. Kinalaunan ay nakumpirma ng Office of the Vice Chancellor for Student Affairs (OVCSA) na ang tao sa likod ng pekeng grupo na ito, na nagngangalang “James Anthony Pajarillo,” ay hindi kasapi ng Unibersidad.  

Ang magkakasunod na insidente ng panghihimasok sa linya pangkomunikasyon ng UP ay naganap sa kasagsagan ng patuloy na pagtaas ng mga kaso ng redtagging sa mga mag-aaral ng UP, lalo na ngayong taon. Matatandaan na noong Mayo ay patuloy ang pag-redtag ng National Task Force to End Local Communist Armed Conflict (NTF-ELCAC) laban sa mga mag-aaral ng UP kung saan sinabi ni National Security Adviser Hermogenes Esperon na “breeding ground ng mga terorista” and Unibersidad.  

Nagbigay ng pahayag ukol sa insidenteng ito ang College of Science Student Council (CSSC). Sa isang panayam, sinabi ni CSSC Chairperson Lars Leo Lenon na politikal ang motibo ng panghihimasok na ito lalo na sa kasagsagan ng banta ng dagdag na pagmamatyag sa mga mag-aaral ng mga kilalang progresibong institusyon.  Aniya, “the very fact that an account posed to be an incoming freshman infiltrated our group chats is a cause for concern.” 

Sa kasalukuyan, naghahanda ng ulat ukol sa insidente ang CSFSTC na ibibigay sa OVCSA at University Student Council (USC). Ayon sa konseho, ang account na nanghimasok ay tinanggal na rin sa mga group chat at sinisiguro ng konseho na ma-block ito ng mga mag-aaral.  

Tinitiyak din nila na upang maiwasan ang ganitong pangyayari sa susunod, ang mga bagong mag-aaral ay palaging hihingian ng “proof of acceptance” at sisiguruhing tugma ang impormasyon sa iba pang mga datos. Pinaaalalahanan nila ang mga organisasyon na maging mas maingat sa ganitong mga sitwasyon.

“Dapat mas maging vigilant tayo dahil napakadaling mameke sa social media. If there are reasons for concern, we advise you to work and coordinate with your student councils and the appropriate authorities for further action,” panawagan ni Lenon. Kaugnay nito, kasalukuyang inihahanda ng CSFSTC ang incident report tungkol sa nangyari at ilalabas ito sa oras na handa na itong isapubliko.

Ayon naman kay USC Councilor Daniel, inalam ni Garcia at ng mga taong nasa likod ng account ang sosyo-politikal na paninindigan ng mga mag-aaral, kaya hindi malayo ang posibilidad na kaugnay ito ng patuloy na isyu ng redtagging sa mga estudyante ng UP.  Iginiit din niya ang papel ng UP-DND Accord upang mapangalagaan at maprotektahan ang mga mag-aaral mula sa ganitong pagbabanta kung kaya’t mahalaga ang pagsasabatas nito.


The USC, through the Safety and Security Committee, quickly responds to such issues by filing an official report to the pertinent offices and by informing the public to be wary of such incidents. Through the Defend UP Network, the USC, along with other UP students, genuinely exhaust all means to safeguard our university from all forms of threats and attacks,”  dagdag ni Daniel. 

Hinikayat din niya ang mga mag-aaral at ibang miyembro ng komunidad ng UP na iulat sa USC ang mga insidente ng paniniktik at kahinahinalang indibidwal sa unibersidad. 

Updates

Recent Posts

%d bloggers like this: